السلام عليكم أتمنى أن تكونوا جميعا بخير وصحة وعافية تتمة وصفات عاشوراء سأقدم لكم بالتفصيل مقادير وطريقة تحضير تمر معمر،و اللوز معسل بالزلجلان مكتوبة مصحوبة بالصور والفيديو 👇
المكونات و الخطوات
مقادير و طريقة تحضير اللوز معسل بالزلجلان
◾ 100غ من اللوز
◾ نصف كأس من الماء
◾ كأس إلا ربع من حبيبات السكر
◾ كمية مهمة من الزلجلان منقي و محمر
طريقة التحضير
في كسرونة فوق النار نوضعو كل من الماء، حبيبات السكر، اللوز من بعد ما مسحناه مزيان من الغبرة، نخليو كلشي فوق البوطة على نار متوسطة، الخليط يبقى يتبخ، ملي ينشف من الماء،
نقصو من العافية و نبقاو نحركو في الخليط حتى يذوب لينا السكر، و يتكون لينا الكراميل.
يتعسل لينا اللوز وسط الكراميل، من بعد نمرمدوه مزيان في الزلجلان محمر.
مقادير و طريقة تحضير التمر معمر
◾ كمية من الثمر
◾ لعقدة اللوز
◾ عجينة المشماش
◾ شوية الكركاع كراميليزي
◾ اللوز محمر و مطحون
◾ شوية قشور الليمون معسل مطحون
بالنسبة للتزيين : نحتاج للقليل من اللوز إيفيلي محمر
◾ القليل من الزلجلان الأبيض
◾القليل من البسطاش
◾كذلك القليل من الكركاع
طريقة التحضير
نحضرو أولا عقدة اللوز: ناخذو180 غ من اللوز نفسخوه من القشرة،نشفوه مزيان و نطحنوه مع شوية المسكة الحرةو 60غ السنيدة (حبوب السكر).
نحصلو على عقدة ، نضيفو عليها ملعقة صغيرة الزبدة، شوية الماء الزهر، نخدموها مزيان حتى تعلك . نقسموها على اثنين.
الجزء الأول نضيفو ليه 130غ من اللوز محمر مطحون مع 2 ملاعق من السنيدة، نزيدو على العقدة شوي القرفة مطحونة.
الجزء الثاني: نضيفو على العقدة العجينة ديال المشماش، مع معلقة كبيرة من قشور الليمون مطحونين، ونضيف كذلك الكركاع كراميليزي. بالنسبة لتحضير عجينة المشماش: ناخذو 80غ من المشماش، نرطبوه نصف ساعة في الماء، نسقطروه، من بعد نطحنوه. في كسرونة نوضعو عجينة المشماش، نضيفو ليها 2 ملاعق من حبيبات السكر، ملعقة كبيرة معامراش من الكليكوز، ملعقة صغيرة من الزبدة، نخليو الخليط فوق البوطة، على نار مهيلة، حتى ينشف و يتعلك مع التحريك المستمر.
◾ بالنسبة لتحضير الكركاع كراميليزي , ناخذو 80غ من الكركاع من بعد ما حمرناه شوية في الفران، نفضوه من القشرة. في كسرونة ناخذو 2 ملاعق من حبيبات السكر،على نار مهيلة حتى يتكون لينا كراميل، نطفيو على العافية و نزيدو الكركاع.
نذهن الرخامة بشوية الزيت، نخويو الخليط،نخليوه حتى يبرد، من بعد نهرمشوه. و أخيرا ناخذو الثمر نمسحوه مزيان بمنديل مفزك بماء الزهر، ونحيدو ليه العلف. من بعد تنعمروه بالعقدة للي وجدنا،و نزوقوه .
طريقة التحضير بالتفصيل الممل في الفيديو بصراحة وصفة متميزة تستحق التجربة بالصحة والعافية
